颱風

香港每年五至十一月是颱風季節，小時候讀書時非常渴望打風，因為唔駛返學。到而家身為上班一族，仍然非常喜歡打風，尤其當雪雪出世之後，就更加希望打風唔駛返工。剛好今年特別多颱風假，今天又打風了，已是今年第五個影響香港的熱帶氣旋。今次呢個颱風叫「黑格比」，英文名叫Hagupit，颱風命名是根據佢嘅來源地，黑格比係來自菲律賓。黑格比之前嗰個颱風來自馬來西亞，英文名叫Nuri，唔知點解香港天文台譯作「鸚鵡」。不過呢隻鸚鵡仔非常厲害，來勢洶洶，香港亦掛起九號風球。上一次九號風球已是2003年的「杜鵑」小姐。香港颱風訊號共分五級，分別係1,3,8,9,10。近年都好少掛十號風球，對上一次已是1999年了，嗰個颱風叫「約克」。

講開颱風名字，小時候啲颱風名非常西化，而且清一色都係女仔名，好似Wanda溫黛(香港史上最兇猛的颱風)、Alice愛麗斯、Shirley雪麗等。後來就加入男性的名字，而近年來名字更趨中國化及多元化，有小說人物「悟空」、生果「榴槤」、傳說中的「玉兔」、花朵「杜鵑」、昆蟲「黃蜂」等。

香港天文台亦有提供熱帶氣旋名字，有些名字如啟德、萬宜、白海豚等還可以理解，但名字如玲玲、珊珊(對不起，無意冒犯叫這些名字的人)就略嫌行貨。哈，如此類推，可能將來會有颱風叫做雪雪、洳洳、輝輝!

今日黃昏六時天文台掛起八號風球，希望亞黑格比可以行慢少少，等媽媽明日有至少半天假期 :)

八號風球下的港島東區






後記：呢個只係八號風球嘅開始，後來啲浪打到兩層樓高，一整條海濱長廊都是海水及沙泥，有些面對海嘅低層住戶更有海水湧入露台呀。