雪雪日記之赤柱半日遊

今早見到爸爸媽媽悠悠閒閒的，佢地話今日係重陽節假期，哈，真開心，上個星期佢地已經放左國慶假期，隔左幾日又有假放！佢地話今日要去郊遊，重約埋公公、婆婆同姨姨一齊去。食完奶之後，媽媽同我扮靚靚，重著左新買嘅牛仔褸，好有型呀！之後我地就會合公公佢地，一行六人坐車出發了。

媽媽話今日我地要去香港島南面一個叫赤柱嘅地方，從我們家開車前往需時約三十分鐘。我們首先爬上一條又長又斜的馬路，接著就走進迂迴曲折的山路，條路又窄又多彎，不過公公駕車技術非常了得，我就一邊享受車子左搖右擺的樂趣，一邊欣賞窗外綠油油的風景。經過一輪山路之後，眼前出現一片大海，媽媽笑說這個不是海，而是一個水塘。水塘是用來儲雨水，然後供應食水給我們。這個水塘叫大潭水塘，於1889年建成。嘩，原來呢個水塘已有超過100年的歷史了！唔知香港一共有幾多個水塘呢？回家睇吓書搵資料先。然後公公開車走在一條好窄的小路上，爸爸話呢條係水壩，接著迎頭有輛大車接近，咦，眼見好似唔係好夠位讓兩架車擦身而過，但只見公公氣定神閒地就將車子慢慢駛過大車旁邊，厲害厲害！過了水壩之後又是另一段山路，偶而見到一些房子，架車搖下搖下，我對眼皮就愈來愈重‧‧‧

一覺醒來見到婆婆抱住我，笑笑口說：「雪雪，妳睡醒嘞，我地到左赤柱啦！」急忙睜大眼睛四處看，眼前有一棟好古舊的建築物，媽媽話呢楝建築物叫美利樓(Murray House) ，前身位於金鐘花園道，是香港碩果僅存的古歐維多利亞式建築物，樓高三層，主要以巨型花崗岩建成。在1982年時，政府要將美利樓拆卸以騰出空地拍賣，但有見及美利樓的歷史價值，政府最後決定將整棟美利樓遷往赤柱保留古蹟，從此成為赤柱的地標。 我們沿路往前行至美利樓旁的赤柱卜公碼頭。公公話卜公碼頭原本位於中環，後來在1965年拆卸。現時赤柱卜公碼頭採用了舊卜公碼頭的上蓋，舉頭看看，真的很有懷舊色彩，與美利樓古雅的建築風格很相配。這裡風真大，吹到我的頭髮都豎起來呀！

接著我們走到赤柱大街，那裡有好多食肆，遊人也很多，非常熱鬧。來到赤柱市集，遇見一對從新西蘭來的老夫婦，他們話未見過Chinese Baby，所以想替我拍一張照片，其實可能佢地想話未見過頭髮豎得咁高嘅Chinese Baby :)

不知不覺行左接近兩個鐘，我覺得有點肚餓，一行人便趕快找地方坐低。咦，呢間咪係我老友包包前幾日同我提起嘅老麥，這裡還有它的妹妹McCafe，回家後一定要告訴包包先！

用膳之後，我們又起程到赤柱的最後一站 ── Taste超級市場。我們在入面團團轉，我也看得眼花撩亂，突然有一個很面熟的人跟爸爸打招呼，哈，我記得我出生當晚見過佢，佢就係幫我媽媽接生嗰個醫生叔叔，我重記得佢打左我屁股一下添，佢話我而家肥左又靚左，好啦，算數啦！

終於要起程回家了，在車上突然感到肚子咕嚕咕嚕響，哎呀哎呀，我要‧‧‧正在運勁「唔唔唔」之際，大人們已經笑作一團，我愈運勁，他們就愈笑得大聲，咁我就「唔」多幾聲等佢地開心吓，其實大人都幾易開心！

回到家中，爸爸媽媽趕忙為我沖涼及按摩，吃過afternoon milk後，媽媽便陪我一起午睡。醒來時又見到姨姨他們，姨姨還帶來了跟我個名一樣咁白雪雪的天使蛋糕，看來好好味呀‧‧‧

開心的時光過得特別快，晚餐及玩耍過後，婆婆他們要回家了，媽媽也抱我回房準備睡覺，不出三秒，在旁的媽媽便已呼呼入睡，想她今天應該非常疲累了。而我仍然感到非常興奮，禁不住嘩嘩大叫起來。爸爸進來，同我講唔好嘈醒媽媽，因為媽媽明天要早起為我準備媽媽奶。係呀係呀，媽媽每朝天未光時已起床為我準備媽媽奶，我應該要安靜點讓她好好休息。看著面前那個鵝媽媽團團轉，轉呀轉呀，我也懷著興奮的心情進入夢鄉了。